Në episodin e parë të sezonit të dytë të emisionit “Kalimtarët” nga Andale Media, sjellim dy histori prekëse të njerëzve të zakonshëm, që në heshtje dhe përkushtim, pasurojnë jetën tonë të përditshme. Ata nuk kërkojnë vëmendje, por meritojnë të dëgjohen.

Pëllumbat e sheshit dhe njeriu që i do si fëmijët e tij

Në qendër të Tiranës, në mesin e zhurmës, hapave të shpejtë dhe jetës së vrullshme, një burrë ndalet çdo ditë. Ai vjen pa zhurmë, me një qese në dorë dhe një zemër të mbushur me kujdes. Ky burrë është i pari kalimtar që sjellim sot. Çdo ditë, ai ushqen pëllumbat e sheshit, jo me bukë, por me gru safi, që sipas tij është shumë më e shëndetshme për këta zogj të qetë e paqësorë.

“Pëllumbat janë shpendë që duan kujdes. Duan dashuri. Nuk janë thjesht kafshë, janë pjesë e shpirtit të qytetit,” thotë ai, duke u ulur në cep të sheshit, ndërsa rreth tij grumbullohen me dhjetëra zogj.

Ai e bën këtë vullnetarisht, pa kërkuar asgjë në këmbim. E bën sepse i sjell kënaqësi shpirtërore, një qetësi që, siç na rrëfen, lidhet edhe me besimin e tij. Është besimtar bektashi dhe ushqimi i përditshëm i këtyre shpendëve është një mënyrë për të ushtruar dashurinë dhe përkujdesjen që feja e tij predikon.

Vilson Korba – një jetë ndërmjet punës, mërgimit dhe mallit për atdheun

Historia e dytë na çon në një tjetër rrugëtim. Vilson Korba, me origjinë nga Skrapari, është një burrë që ka kaluar shumë. Ka punuar në Kombinatin Ushtarak të Poliçanit, me pasion dhe përkushtim, derisa ndryshimet e mëdha të vitit 1991 sollën vështirësi të mëdha për të dhe për shumë të tjerë si ai.

Në vitin 1992, ai mori rrugën e emigrimit të paligjshëm drejt Greqisë, ku qëndroi deri në vitin 1997. Ishin vite të vështira, me përballje me racizëm dhe vështirësi të shumta, por nuk e humbi asnjëherë durimin dhe dinjitetin.

Sot, ai thotë se shumë gjëra kanë ndryshuar në Greqi, për mirë. Por në zemrën e tij mbetet një peng: mungesa e fëmijëve dhe nipërve pranë.

“Atdheun nuk duhet ta braktisim kurrë. Edhe kur është e vështirë, duhet ta duam dhe të punojmë për të. Kurrë mos hiqni dorë nga Shqipëria,” është mesazhi i tij i fortë.