Testuam një mashkull: Sa e kupton gjuhën e gocave?

Nga Andale
26 Shtator 2025, 19:36

Në episodin më të ri të G.O.A.T.S. në ANDALE Media, gocat kishin përgatitur një sfidë të veçantë për Florin: ta testonin nëse e kupton vërtet gjuhën e vajzave. Jo atë që thuhet, por atë që nënkuptohet. Rezultatet? Le të themi që Flori pati një ditë të vështirë.

Skenari i parë: njëra nga gocat thotë “Nuk jam xheloze”. Flori mendoi se kjo do të thotë që ajo është mirëkuptuese. Gabim. Përkthimi i saktë? Është xheloze, por nuk do ta pranojë. Thjesht pret që ta kuptosh vetë.

Rasti i dytë: “S’ka gjë, e bëj vetë”. Flori e mori si shenjë të pavarësisë. Sërish gabim. Në të vërtetë, ajo po pret që të ofrohesh vetë, jo të të justifikosh me "është e zonja vetë".

Momenti i tretë: “Bëj çfarë të duash”. Këtu Flori ngre vetullat dhe thotë: “Më duket si kërcënim.” Saktë. Në këtë pikë, ai fillon të kuptojë terrenin.

Situata e katërt: “Hiç shpirt, s’kam gjë”. Flori reagon me “nuk e pyes më se çfarë ka”. Gabim. Pikërisht këtu duhet të pyesësh edhe më shumë, edhe kur përgjigjja është “s’kam gjë”.

Pika e fundit: “Ok.” Flori përgjigjet menjëherë: “është mërzitur.” Këtë e kapi. Saktë.

Me vetëm dy përgjigje të sakta nga pesë, Flori e përmbylli sfidën me një reflektim që i përmbledh të gjitha: “Unë paskam jetuar kot deri tani.”